Nuffnang Ads

Followers

Tuesday 9 May 2017

Bala Indu Bengepan

Bala Indu Bengepan 
(Pelilih menua pegai Betong enggau Saratok)


Indai aku Madam Sylvia Sayah


Bala petunggal aku siku ke nama Bibi Tera lumur dua ari kanan

Bala Indu bengepan nya udu lawa. Ba sanggul sida diujakka sugu tinggi pirak belilap ti dilagu enggau bunga keretas. Pending sida Dara kering ditating antin panjai ti merundai ngagai tuntun dagu ngilah pun rang. Janga kedua-dua bau kiba enggau kanan dilempaika selampai panjai ti dibelit sandik kandi ke kiba enggau ke kanan sereta lalu ngelamun buah dada. Ujung panjai selampai panjai nya dipelawik lalu besabung ujung ba urung tengan belakang. 

Marik empang di beukir mayuh macham sereta berambutka bunga rambu dirasukka ba urung rekung lalu mungkur kedua-dua janga bau sereta ngebap engkepan dada nyekang. Ba ruas lengan ari aras buku siku, dirasukka engkerimuk betusuk ngagai pun berang. Tumpa pirak dirasukka ari dekuan sampai ke buah lengan nyau berak-berak terang. Rawai dipasukka nyengkerung perut enggau punggung lalu nyakum kerigai ari atas rusuk marang. Singkap duit ringgit tauka nyawir ti lekat ba rawai nya bekekelip baka bintang. 

Kain kebat tauka kain sungkit benang emas ti dikena nya betatingka singkap duit ringgit ti nyau bekesering dibai sida Endun Kumang nyingkang. Ba engkepan punggung nanggam kain nya lampit bepala besai ditambit rapit nadai meranggang. Jari kiba sida Dara Nganta ngenggam perecha diberi sida Aya Mawa Dum Bujang. Jari kanan sida Dara Ganggam minching sigi buah paul begamal melan-melan. Nyengkilung rekung lalu merundai ngagai urung dada nya tali rantai pirak panjai ti disebut tali luji. 

Ba urung rakat ari atas buku ali kedua-dua piak kai dirasukka gelang dikumbai kerunching ti bisi disangkingka gerunung mit.

Ari Bup Ripih Pengawa Gawai Antu
ditusun Jantan Umbat & Janang Anak Ensiring
The Tun Jugah Foundation Publication Series

Gambar ari koleksi keluarga